Koskenades 22 Quiche

Vandag gesels ons oor quiche. Toe ek in die restaurant en kosbedryf begin het, het ek gewonder waar die snaakse naam quiche vandaan kom maar ek het nooit gedink om moeite te doen om te gaan soek waar die woord vandaan kom nie.

Ons het wel baie pret gehad oor hoe verskillende mense hierdie dis se naam op die snaakste maniere uitspreek. Ons het goed gehoor soos kiees, kwishie, kwuits – maar ek en Hanlie het die lekkerste gelag vir kwiesh.

Die regte uitspraak is (foneties) KEESH. Die woord quiche is afkomstig van die streek Lorraine in Frankryk wat ‘n gemengde Franse-Duitse dialek praat en quiche kom van küeche wat koek beteken in Duits.

Quiche is dus ‘n eg Franse dis wat bestaan uit ‘n kors en ‘n smaaklike vulsel wat van eiers en melk of room gemaak word en wanneer dit gebak word vorm dit ‘n heerlike vla op ‘n pastei deeg.

Die vulsels het ook verskillende byvoegings wat wissel van vleis, vis, groente en selfs vrugte. Quiche resepte word al sover terug as die veertiende eeu opgespoor in kookboeke.

Die oorsponklike Quiche Lorraine wat nog altyd ‘n gunsteling bly, het net uit ‘n pasteikors bestaan met die vulsel wat slegs uit eier en room mengsel en gerookte spek bestaan het. Daar was ook geen uie of kaas bygevoeg soos wat ons vandag die Quiche Lorraine ken nie. Quiche Lorraine was oorspronklik op ‘n baie ongekunstelde eenvoudige manier in ‘n gietysterpan gebak met die kors wat onafgewerk gelos is, nie soos ons dit vandag ken met ‘n mooi gekartelde kors kant wat perfek lyk en mooi gesny word nie. Deesdae maak ons ook selfs individuele mini quiches in mooi porsie groottes.

Die kors van die quiche is oorspronklik net van brood deeg gemaak maar intussen het die kors al ontwikkel in baie interesante variasies. Verskillende variasies van broskors, skilferkors en nog baie ander.

‘n Interessante kors wat baie maklik is maar baie lekker is het ons juis die naweek by ons skoonsuster Charlene gekry. Dit bestaan net uit meel, gerasperde kaas, botter en ‘n knippie rooi peper wat jy meng en in ‘n voorbereide quiche pan druk met jou vingers.

Vir my is die kors wat ek en Hanlie al jare gebruik nog die maklikste. Ons koop net kaasgegeurde sout koekies, maak dit fyn en meng met gesmelte botter. Jy druk dit dan met die agterkant van ‘n lepel in ‘n quiche pan, gooi vulsel in en bak in oond tot die vulsel gaar is en stol.

Eintlik is ‘n quiche so ‘n veelsydige dis want jy kan dit enige tyd van die dag of aand eet deur net jou vulsel te varieer.

Quiche Lorraine is ideaal vir ontbyt, quiche met spinasie, feta kaas en uie is weer geskik vir middag ete en dan is ‘n quiche met vleis in soos kaasworsies en spek heerlik saam met ‘n slaai vir aandete.

Quiche het in Amerika die reputasie ontwikkel as ‘n ete vir vrouens en dit word ook maar hier in SA meer dikwels deur vroue in restaurante bestel as ‘n ete.

Daar is wel ‘n quiche wat ‘n vulsel het van biltong, preie en bloukaas wat vir seker meer in ‘n man se smaak sal val.

Om jou vulsel nog lekkerder en meer substansieel te maak kan jy die room in die eiermengsel met gladde maaskaas of roomkaas vervang, die quiche se digtheid is dan baie soos ‘n gebakte kaaskoek, dit is voorwaar ‘n baie interessante variasie om te probeer.

Eksperimenteer gerus deur amper enige van jou gunsteling bestandele en verskillende kombinasies op ‘n lekker quiche kors te pak en net die eier en room mengsel by te voeg en bak vir jou ‘n heerlike quiche vir enige geleentheid.

‘n Quiche bak gewoonlik vir so 45 minute teen 180°C of tot die eiermengsel gestol het.

Die verskil tussen quiche en sout tert is  dat ‘n quiche ‘n soutige eiervla mengsel as basis het terwyl ‘n sout tert enige ander stysel soos mielieblom of koekmeel as basis kan hê – en dit met of sonder eier om die mengsel te bind.

Bon Appequiche!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s